Thaenaaram | Tamil Obituary Notices | Remembrance Notices | Tamil Death Notices

பாடசாலை மாணவி தீயில் கருகி மரணம்

வீட்டு சுவாமி அறையில் விளக்கேற்றிய போது பெற்றோல் கலன் தீப்பற்றி விபத்துக்குள்ளானதில் பாடசாலை மாணவி ஒருவர் தீயில் கருகி உயிரிழந்துள்ளார்.

யாழ்.பண்டத்தரிப்பு பகுதியில் இத்துயரச் சம்பவம் இன்று திங்கட்கிழமை மாலை இடம்பெற்றது.

மகாஜனா கல்லூரி மாணவியான பண்டத்தரிப்பை சேர்ந்த சுதர்சன் - சுதர்சிகா (வயது-17) என்ற மாணவியே இதன்போது உடல்கருகி பரிதாபமாக உயிரிழந்துள்ளார்.

சம்பவம் தொடர்பில் மேலும் தெரியவருவதாவது;

தற்போது நாட்டில் ஏற்பட்டுள்ள எரிபொருள் தட்டுப்பாடு காரணமாக பெற்றோலை வாங்கி சேமித்து வைக்கும் நோக்கில் வீட்டு சுவாமி அறையில் பெற்றோல் நிரப்பப்பட்ட கலன் வைக்கப்பட்டிருந்தது.

இந்நிலையில் இன்று மாலை வழக்கம் போல் சுதர்சிகா வீட்டு சுவாமி அறையில் விளக்கேற்றிவிட்டு தீக்குச்சியை கீழே போட்டுள்ளார்.

இதன்போது சுவாமி தட்டுக்கு கீழாக வைக்கப்பட்டிருந்த பெற்றோல் கலனில் கீழே விழுந்த தீக்குச்சி பட்டதும் தீப்பற்றி எரிந்தபோது இந்த அனர்த்தம் ஏற்பட்டுள்ளது.

மூன்று உறவுகளைத் தேடிய தாய் ஏக்கத்தால் உயிர்விட்டார்

வவுனியாவில் காணாமல் ஆக்கப்பட்ட தனது மகன், மருமகன், பேரன் ஆகிய மூவரை தேடிவந்த தாய் ஒருவர் சுகவீனம் காரணமாக நேற்று ஞாயிற்றுக்கிழமை இரவு மரணமடைந்துள்ளார்.

வவுனியா கிறிஸ்தவகுளம் பகுதியை சேர்ந்த செல்லையா செல்வராணி (வயது-75) என்ற தாயே இவ்வாறு மரணமடைந்துள்ளார்.

இவரது மகன், தங்கராசா தயாபரன் (வயது 41), மருமகன், தம்பு தியாகராசா (வயது 56), பேரன், தியாகராசா மனோகரன் (வயது 31) ஆகிய மூவரும் கடந்த 2008 ஆம் ஆண்டு வவுனியா செட்டிகுளத்தில் விறகுவெட்ட சென்றபோது கடத்தப்பட்டு காணாமல் ஆக்கப்பட்டிருந்தார்.

அவரைத் தேடி வவுனியாவில் கடந்த 1898 நாட்களாக முன்னெடுக்கப்பட்டுவரும் சுழற்சிமுறை உணவுத்தவிர்ப்புப் போராட்டத்திலும் குறித்த தாய் கலந்துகொண்டு தனது மகன், மருமகன், பேரன் ஆகிய மூவரையும் கண்டுபிடித்து தரப் போராடியிருந்தார்.

இந்நிலையில் மூவரையும் காணாமலேயே அவர் நேற்று முன் தினம் மரணமடைந்தமை குறிப்பிடத்தக்கது.